နိုင်ငံတကာအကြီးအကဲများ တည်းခိုနိုင်ရန် နိုင်ငံတော်ဧည့်ဂေဟာအတွင်း ဟိုတယ်ခြောက်လုံးဖွင့်

Page View : 1,312
News Type : Travel

ခန့်ထက်

ရန်ကုန်၊ဇန်န၀ါရီ- ၄

အတွဲ (၁၂)၊ အမှတ်(၄၄)

နိုင်ငံတော်ဧည့်ဂေဟာအတွင်း အာဆီယံနှင့် နိုင်ငံတကာအကြီးအကဲများတည်းခိုရန် လေးရက်အတွင်း ဟိုတယ်ခြောက်လုံးထိ ဖွင့်လှစ်ပေးခဲ့ကြောင်း ဟိုတယ်နှင့်ခရီးသွားလာရေးလုပ်ငန်းဝန်ကြီးဌာနမှ သတင်းရရှိသည်။

နိုင်ငံတော်ဧည့်ဂေဟာအတွင်း ဖွင့်လှစ်သော ဟိုတယ်များမှာ ဇန်န၀ါရီ ၁ ရက်က Royal Presidant Hotel ၊ ဇန်န၀ါရီ ၂ ရက်က Grand Amara နှင့် နွယ်သာကီဟိုတယ်၊ ဇန်န၀ါရီ ၃ ရက်က သင်္ဂဟဟိုတယ်နှင့် Imperial Lake Hotel ၊ ဇန်န၀ါရီ ၄ ရက်က Imperial Villa ဟိုတယ်တို့ကို ဖွင့်လှစ်ခဲ့သည်။ နိုင်ငံတော်ဧည့်ဂေဟာအတွင်း ဟိုတယ်များဖွင့်လှစ်ရခြင်းမှာ အာဆီယံအလှည့်ကျဥက္ကဋ္ဌတာဝန်ကို ထမ်းဆောင်စဉ်ကာလအတွင်း ပြုလုပ်မည့် အာဆီယံအစည်းအဝေးများ တက်ရောက်ကြမည့် နိုင်ငံတကာအကြီးအကဲများ တည်းခိုနေထိုင်နိုင်ရေးအတွက် ဖွင့်လှစ်ခြင်းဖြစ်ကြောင်း ဟိုတယ်နှင့်ခရီးသွားလာရေးလုပ်ငန်းဝန်ကြီးဌာနမှ တာဝန်ရှိသူတစ်ဦးကပြောသည်။

ယင်းဟိုတယ်များတွင် တည်းခိုနေထိုင်နိုင်ရေးအတွက် ဟိုတယ်အခန်းများသာမက နိုင်ငံတော်အကြီးအကဲများ သီးသန့်တွေ့ဆုံနိုင်ရန် ခန်းမများ၊ အစည်းအဝေးခန်းမများ၊ သံတမန်ခန်းမများ၊ ဧည့်ခန်းဆောင်ပါ ဟိုတယ်အခန်းများ ပါဝင်သည်။

လက်ရှိတွင် နေပြည်တော်ရှိ စီးပွားရေးလုပ်ကိုင်နေသော ဟိုတယ်များမှာ နိုင်ငံတကာမှ အကြီးအကဲများအတွက် လိုအပ်သောအသုံးအဆောင်များ မရှိသလောက်နည်းပါးကြောင်း ဟိုတယ်လုပ်ငန်းရှင်များအသင်း တာဝန်ရှိသူတစ်ဦးကဆိုသည်။

“လုံခြုံရေးအတွက်က အရေးကြီးတယ်။ ပြီးတော့ နိုင်ငံတကာအကြီးအကဲတွေအတွက် လိုအပ်ရင် ရဟတ်ယာဉ်ဆင်းသက်နိုင်တဲ့နေရာတွေပါ လိုအပ်တယ်။ ဒီဟိုတယ်တွေက အဲဒီအတွက် ဆောင်ရွက်ထားနိုင်တယ်”ဟု ၎င်းက နိုင်ငံတော်ဧည့်ဂေဟာအတွင်း ဟိုတယ်များနှင့်ပတ်သက်၍ သုံးသပ်ပြောသည်။ ယင်းဟိုတယ်များသည် စီးပွားရေးအရ တွက်ခြေကိုက်နိုင်မှုမရှိသော်လည်း နိုင်ငံတော်အတွက် လိုအပ်ပြီး ၁၀ လုံးခန့် ဆောက်လုပ်ရန်ရှိကြောင်း ၎င်းကဆိုသည်။

လက်ရှိတွင် နေပြည်တော်ဟိုတယ်ဇုန်တွင် စီးပွားရေးလုပ်ကိုင်နေသော ဟိုတယ်အလုံးပေါင်း ၅၀ ကျော်ရှိနေပြီး အခန်းပေါင်း လေးထောင်နီးပါးရှိနေပြီဖြစ်ကြောင်း နေပြည်တော်ဟိုတယ်ဇုန်မှ သတင်းရရှိသည်။


Post on : 03/02/2557 10:57