တာဝန်သိခရီးသွားလုပ်ငန်း ဖွံ့ဖြိုးတိုးတက်ရေး အီတလီနိုင်ငံနှင့် ပူးပေါင်းဆောင်ရွက်မည်

Page View : 1,369
News Type : Travel

ခန့်ထက်

ရန်ကုန်၊ဇန်န၀ါရီ- ၁၁

အတွဲ (၁၂)၊ အမှတ်(၄၅)

မြန်မာနိုင်ငံ၏ တာဝန်သိခရီးသွားလုပ်ငန်း အထောက်အကူပြုအစီအစဉ် ဆောင်ရွက်နိုင်ရန် တစ်နှစ်မှသုံးနှစ်အထိ ရည်ရွယ်ထားပြီး အီတလီနိုင်ငံနှင့် ပူးပေါင်းဆောင်ရွက်မည်ဖြစ်ကြောင်း ဟိုတယ်နှင့်ခရီးသွားလာရေးလုပ်ငန်းဝန်ကြီးဌာနမှ သတင်းရရှိသည်။

တာဝန်သိခရီးသွားလုပ်ငန်းဆိုသည်မှာ မိမိနိုင်ငံအတွင်း ပိုမိုကောင်းမွန်သော လည်ပတ်စရာနေရာများ ဖန်တီးပေးသော ခရီးသွားလုပ်ငန်းဖြစ်ပြီး ၀န်ကြီးဌာန၊ ပုဂ္ဂလိကလုပ်ငန်းရှင်များ၊ လူမှုအဖွဲ့အစည်းများ၊ ဒေသခံများက ပူးပေါင်းဆောင်ရွက်ရသည်။

မြန်မာနိုင်ငံ၏ တာဝန်သိခရီးသွားလုပ်ငန်းဖွံ့ဖြိုးတိုးတက်ရေးအတွက် အီတလီနိုင်ငံ La Sapienza တက္ကသိုလ်နှင့် အမျိုးသားစီမံခန့်ခွဲမှုပညာကောလိပ်တို့မှ ပညာရှင်များ ပူးပေါင်းဆောင်ရွက်သွားမည်ဖြစ်ကြောင်း ဟိုတယ်/ခရီးမှ သတင်းရရှိသည်။

ပညာရှင်များနှင့်ပူးပေါင်း၍ ခရီးစဉ်ဒေသများတွင် သုတေသနပြုလုပ်ခြင်း၊ အလုပ်ရုံဆွေးနွေးပွဲများပြုလုပ်ခြင်း၊ နှစ်နိုင်ငံအပြန်အလှန်လေ့လာခြင်း၊ ဗဟုသုတဖလှယ်ခြင်းများကို ဆောင်ရွက်မည်ဖြစ်ကြောင်း ဟိုတယ်/ခရီးဝန်ကြီးဌာန တာဝန်ရှိသူတစ်ဦးကဆိုသည်။

ဟိုတယ်နှင့်ခရီးသွားလာရေးလုပ်ငန်းဝန်ကြီးဌာနသည် ခရီးသွားလုပ်ငန်းဆိုင်ရာ လူ့စွမ်းအားအရင်းအမြစ်ဖွံ့ဖြိုးတိုးတက်ရေးအတွက် လူဇင်ဘတ်နိုင်ငံ၏ အကူအညီကိုရရှိခဲ့ပြီး ခရီးသွားလုပ်ငန်းဆိုင်ရာ စာရင်းဇယားများ ကောက်ယူနိုင်ရေးအတွက်လည်း ကမ္ဘာ့ခရီးသွားလုပ်ငန်းအဖွဲ့ပညာရှင်များ၏ အကူအညီကို ရရှိခဲ့ခြင်းဖြစ်သည်။

မြန်မာနိုင်ငံသို့ နိုင်ငံခြားခရီးသည် ၀င်ရောက်မှုမှာ နှစ်စဉ်တိုးတက်ခဲ့ပြီး ၂၀၁၃ နှစ်ကုန်တွင် ခရီးသည်နှစ်သန်းကျော် ၀င်ရောက်လာသဖြင့် ၂၀၁၂ ခုနှစ်နှင့်နှိုင်းယှဉ်ပါက တစ်သန်းနီးပါးတိုးတက်လာခဲ့ကြောင်း ဟိုတယ်/ခရီးဝန်ကြီးဌာန၏စာရင်းများအရသိရသည်။

တိုးတက်လာသော နိုင်ငံခြားသားခရီးသွားဦးရေအရ မြန်မာနိုင်ငံခရီးသွားလုပ်ငန်း ပင်မစီမံကိန်းကို ရေးဆွဲခဲ့ပြီး စီမံကိန်း ၃၈ ခုဖြင့် တစ်နိုင်ငံလုံးတွင် ဆောင်ရွက်သွားမည်ဖြစ်ရာ နိုင်ငံတကာအကူအညီရရှိနိုင်ရေးအတွက်လည်း လိုအပ်ကြောင်း ဟိုတယ်နှင့်ခရီးသွားလာရေးလုပ်ငန်းဦးစီးဌာန ညွှန်ကြားရေးမှူးတစ်ဦးကပြောကြားသည်။


Post on : 03/02/2557 10:49