ရန်ကုန်မြို့စွန် အိမ်ခြံမြေအရောင်းအ၀ယ်ပုံမှန်ဖြစ်

Page View : 1,377
News Type : Property

မိုးညို

ရန်ကုန်၊ ဇန်န၀ါရီ-၆

အတွဲ (၁၂)၊ အမှတ်(၄၄)

ရန်ကုန်မြို့၏ အိမ်ခြံမြေဈေးကွက်အတွင်း မြို့စွန်နေရာအချို့တွင် စီးပွားရေးအရ အမှန်တကယ်ရင်းနှီးမြှုပ်နှံသူများ လာရောက်ဝယ်ယူမှုများကြောင့် အရောင်းအ၀ယ်ပုံမှန်ဖြစ်နေကြောင်း အိမ်ခြံမြေအကျိုးဆောင်များထံမှ သတင်းရရှိသည်။

“မြို့စွန်တွေက လမ်းမမေးတင်လေးတွေ နည်းနည်းအ၀ယ်လိုက်နေတယ်။ တကယ်ရင်းနှီးမြှုပ်နှံမယ့်သူတွေက လိုက်ဝယ်နေတာ”ဟု ရွှေမြေအိမ်ခြံမြေအကျိုးဆောင် ဦးသန်းစိုးကပြောသည်။

အထူးသဖြင့် စီမံကိန်းဧရိယာများတွင်ပါဝင်သည့် သီလ၀ါစီမံကိန်းနယ်မြေနှင့် အနီးစပ်ဆုံးနေရာများတွင် အလုပ်ဖြစ်နေကြောင်း သိရသည်။

သန်လျင်ဘုရားကုန်းအနီးတစ်ဝိုက်နှင့် ရေကြောင်းတက္ကသိုလ်အနီးတစ်ဝိုက်တွင် နေ့စဉ်မြေ၀ယ်ယူရန် လာရောက်ကြည့်ရှုသူများနှင့် ပြန်လည်စည်ကားနေပြီး အောင်ချမ်းသာအနီးတွင်မူ ဈေးကစားသူများသာ အရောင်းအ၀ယ်ပြုလုပ်နေကြကြောင်း သန်လျင်မြို့နယ်မှ အိမ်ခြံမြေအကျိုးဆောင်တစ်ဦးကဆိုသည်။

ယခုနှစ်အတွင်း စီမံကိန်းအရ ပျက်ပြယ်နေပြီဖြစ်သည့် ရန်ကုန်-ဒလတံတားစီမံကိန်းအရ ဒလမြို့နယ်တွင် အိမ်ခြံမြေအရောင်းအ၀ယ်မှာ သိသိသာသာကောင်းလာခြင်းမရှိဘဲ ဈေးနှုန်းများပင် ကျဆင်းသွားကြောင်း သိရသည်။ “အရင်ဈေးကောင်းရခဲ့တဲ့ ကျန်စစ်သားရပ်ကွက်ထဲက နေရာတွေမှာ အရောင်းအ၀ယ်လည်း မရှိတော့ဘူး ဈေးတွေလည်းကျသွားတယ်”ဟု ဒလမြို့နယ်အိမ်ခြံမြေအကျိုးဆောင်ကဆိုသည်။

သို့သော် ဒလမြို့နယ်အလွန် တောကြီးတန်းနှင့် ကော့မှူးလမ်းမမေးတင်နေရာများတွင်မူ အရောင်းအ၀ယ်အချို့ဖြစ်ကြောင်း အထက်ပါအကျိုးဆောင်ကဆိုသည်။

ရန်ကုန်မြို့တွင်းနေရာအများစုတွင်မူ စည်ပင်သာယာရေးကော်မတီက မကြာမီသတ်မှတ်မည့် မြို့ပြမြေအသုံးချမှုဇုန်နယ်မြေများ သတ်မှတ်မည်ဆိုခြင်းကြောင့် ရင်းနှီးမြှုပ်နှံလိုသူများက စောင့်ကြည့်နေကြဆဲဖြစ်သည်။

သို့သော် ၂၀၁၄ ခုနှစ်အတွင်း အများပိုင်အဆောက်အအုံဥပဒေ ထွက်ပေါ်လာမည်ဖြစ်သောကြောင့် ရန်ကုန်မြို့တွင်းပိုင်းမှ ကွန်ဒိုတိုက်ခန်းအချို့ ကြိုပွိုင့်စနစ်ဖြင့် အဓိကအရောင်းအ၀ယ်ဖြစ်နေကြောင်း Capital Development ကုမ္ပဏီမန်နေဂျာကပြောပြသည်။


Post on : 03/02/2557 10:39