နယူးချောင်းသာနှင့် သီရိမြိုင်လုပ်ကိုင်ခွင့် လုပ်ငန်းရှင်နှစ်ဦးရ

Page View : 1,317
News Type : Travel

ခန့်ထက်

ရန်ကုန်၊ နိုဝင်ဘာ-၂

အတွဲ (၁၂)၊ အမှတ်(၃၅)

ဟိုတယ်၊ ခရီးသွားဝန်ကြီးဌာနပိုင် ဟိုတယ်များအနက် ချောင်းသာရှိ နယူးချောင်းသာဟိုတယ်နှင့် ပြင်ဦးလွင်ရှိ သီရိမြိုင်တို့အား တစ်နှစ်ငှားရမ်းလုပ်ကိုင်ခ ကျပ်သိန်း ၄၂၀၀၊ ကျပ်သိန်း ၂၀၀၀ စီဖြင့် အသီးသီးတင်ဒါအောင်မြင်ခဲ့ကြောင်း သတင်းရရှိသည်။

ချောင်းသာရှိ အခန်း ၂၇  ခန်းပါ နယူးချောင်းသာဟိုတယ်ကို ပြည်တွင်းလုပ်ငန်းရှင် ဦးဇင်မင်းမောင်မောင်က တစ်နှစ်ငှားရမ်းခ ငွေကျပ်သိန်း ၄၂၀၀ ဖြင့်လည်းကောင်း၊ ပြင်ဦးလွင်ရှိ အခန်း ၇ ခန်းပါရှိသော သီရိမြိုင်ဟိုတယ်ကို ဒေါ်ယမင်းချိုက ငှားရမ်းခ ငွေကျပ်သိန်း ၂၀၀၀ ဖြင့် အမြင့်ဆုံးပေးကာ တင်ဒါအောင်မြင်ခဲ့ကြောင်း ဟိုတယ်၊ ခရီးဝန်ကြီးဌာနမှ သတင်းထုတ်ပြန်ထားသည်။

ဝန်ကြီးဌာနအနေဖြင့် ဌာနပိုင်ဟိုတယ်နှင့် ဧည့်ရိပ်သာရှစ်လုံးကို ယခုနှစ် ဇွန်လဆန်းပိုင်းက ပုဂ္ဂလိကသို့ ငှားရမ်းလုပ်ကိုင်ခွင့်ပေးမည်ဖြစ်ကြောင်း ကြေညာထားခဲ့သည်။

ယင်းသို့ ပုဂ္ဂလိကကို လုပ်ကိုင်ခွင့်ပေးမည်ဖြစ်သော ဟိုတယ်နှင့် ဧည့်ရိပ်သာရှစ်လုံးမှာ ပြင်ဦးလွင်ရှိ နန်းမြိုင်၊ သီရိမြိုင်၊ ဂန္ဓမာမြိုင်ဟိုတယ်များ၊ ကျောက်ဆည်ရှိ ကျောက်ဆည်ရိပ်သာ၊ ချောင်းသာရှိ နယူးချောင်းသာဟိုတယ်၊ ကျိုင်းတုံရှိ ကျိုင်းတုံဟိုတယ်(သစ်)၊ မြောက်ဦးရှိ မြောက်ဦးဟိုတယ်တို့ဖြစ်သည်။

ယခုတင်ဒါအောင်မြင်ခဲ့သူများသည် တင်ဒါစည်းမျဉ်းအတိုင်း ဆက်လက်၍ ၀န်ကြီးဌာနနှင့် စာချုပ်ချုပ်ဆိုသွားမည်ဖြစ်ကြောင်း ဟိုတယ်နှင့် ခရီးသွားလာရေးဝန်ကြီးဌာန တာဝန်ရှိသူတစ်ဦးကပြောသည်။

ဟိုတယ်နှင့် တည်းခိုရိပ်သာများကို ပုဂ္ဂလိကသို့ လွှဲပြောင်းလုပ်ကိုင်စေခြင်းကြောင့် ဟိုတယ်များထက် ပိုပြီးဝန်ဆောင်မှုပိုင်းတွင် ပိုကောင်းလာနိုင်ကြောင်း မြန်မာနိုင်ငံ ဧည့်လမ်းညွှန်အသင်း တာဝန်ရှိသူတစ်ဦးက သုံးသပ်သည်။

ဝန်ကြီးဌာနပိုင် ဟိုတယ်များသည် တည်းခိုရာတွင် ဧည့်သည်များအတွက် အဆင်မပြေမှုများရှိခြင်း၊ အခန်းတွင်းလိုအပ်ချက်များ အချိန်မီမဖြည့်ဆည်းပေးနိုင်သော အချက်များရှိကြောင်း
မန္တလေးဟိုတယ်ဇုန် အထွေထွေအတွင်းရေးမှူးက မှတ်ချက်ပြုခဲ့သည်။

လက်ရှိတွင် တစ်နိုင်ငံလုံးအတိုင်းအတာဖြင့် လိုင်စင်ချထားပြီး ဟိုတယ်နှင့် တည်းခိုရိပ်သာ စုစုပေါင်း ၈၉၁ လုံးရှိသည့်အနက် ဌာနမှ ငှားရမ်းဟိုတယ် ၂၁ လုံးအထိရှိကြောင်း ဟိုတယ်နှင့် ခရီးသွားလာရေးလုပ်ငန်းဝန်ကြီးဌာနမှ ထုတ်ပြန်သော စာရင်းဇယားများတွင် ဖော်ပြထားသည်။

 

http://www.7daynewsjournal.com/article/12532


Post on : 26/11/2556 10:58